"Lu di mana Dir?" tanya Kobar lewat HP-nya.
"Kemari Bar, warungnye Yatno," balas Kodir.
Selepas isya, Kobar emang niat ngopi di sana. Puyeng bener dia urusan sekolah dan kerjaannya. Kagak nyampe 10 menit, Kobar tiba. Jaraknya yang cuma 20 meter dari Masjid Baitul Makmur, bikin warung Yatno jadi tempat favorit buat nongkrong.
"Apa nyang mau dikerjain duluan yak? Tesis mepet, kerjaan kantor juga belom kelar," sergahnya sembari duduk di depan Kodir. Tangannya seketika menyamber onde-onde di meja. Diabisinnya kue bertabur wijen itu dalam tiga kali gigitan.
"Kuncinya cuma atu Bar, kerjain!" kata Kodir.
"Gue juga tau!" Kobar sewot sembari comot lemper.
"Hahah...ya pegimana, cuma lu yang bisa selesein. Gue mah doain aje."
Kobar kagak nyaut. Mulutnya penuh lemper yang segera ditelen. "Kopi Liong No," pintanya ke Yatno setelah ketan berisi ayam itu masuk ke perutnya.
Sebentaran kopi terhidang. Berhubung Masih panas, Kobar nyomot lemper kedua.
"Ngapa ngedadak ganyem lu Bar, stress eating? Baek-baek binge eating disorder lu," kata Kodir.
"Ahhh...biarin!" kata Kobar.
"Opo kuwi mas, penyakit baru kayak covid?" tiba-tiba Yatno masuk percakapan keduanya.
Kodir yang lulusan S2 kesehatan masyarakat di kampus terkemuka Depok, coba menjelaskan.
"Kagak ada urusannye sama virus. Itu macem penyakit jiwa. Gegara stres bawaannye mau makan terus sama kadang marah-marah. Nyang parah sih kalo binge itu, orangnye gak sadar kalo dia udah makan banyak. Mangkanye, tuh orang bisa kagak punye pinggang!"
"Ohh kalo ada orang yang makan tiga potong tapi ngakunya dua potong, terus pas ditagih marah-marah karena ngerasa dia 'ditembak' bayar mahal, itu termasuk kena penyakit ini? Orang stres kan gampang marah yo mas?"